TƏBİB-dən 5 min manatlıq koronavirus dərmanı ilə bağlı – AÇIQLAMA

“Koronavirus xəstəliyinin müalicəsində istifadə edilən “Favipiravir” dərmanı satışda yoxdur və ağır xəstələrin müalicəsində həkimin göstərişi ilə istifadə edilir”.
Bunu “Baku Post”a açıqlamasında Tibbi Ərazi Bölmələrini İdarəetmə Birliyinin (TƏBİB) mətbuat xidmətinin rəhbəri Rəvanə Əliyeva deyib. Onun sözlərinə görə, bu dərmanı aptekdən alaraq xəstə özü sərbəst istifadə edə bilməz.
Qurum rəsmisi ölkədə dərman preparatlarının gətirilməsində çətinlik yaranması barədə iddiaları da cavablandırıb. R.Əliyeva bildirib ki, dünyada bu gün COVİD-19-un müalicəsində effektiv hesab edilən bütün dərman vasitələri Azərbaycana gətirilir, eyni zamanda da “Favipiravir”. “Qaldı ki, qara bazarda satışı və s. ilə bağlı məsələ bu TƏBİB-in nəzarətində deyil. Çünki nəinki qara bazar, ümumiyyətlə apteklərdə satılan dərman vasitələri və s. qurumun səlahiyyətində deyil. TƏBİB yalnız xəstəxanaların dərman vasitələri ilə təminatına səlahiyyətlidir”.
Xatırladaq ki, iqtisadçı ekspert Qubad İbadoğlu adıçəkilən virusla mübarizə üçün istifadə edilən “Favipiravir”nin ölkəmizdə olduqca az olduğunu, 30 həblik bir qutunun 50 manat olmasına baxmayaraq “qara bazar”da 5000 manata satıldığını deyib.
“Verilən informasiyaya görə, dövlətin sifariş etdiyi tibbi ləvazimat və aparatların çoxu ölkəyə gətirilməyib və bundan sonra gəlməsi də imkansızdır”.