Baş nazir Netanyahu müdafiə nazirini istefaya göndərdi - Qalmaqal

İsrailin müdafiə naziri Yoav Qallant ölkədə məhkəmə islahatları planlarına son qoymağa çağırdıqdan sonra o baş nazir Benyamin Netanyahu tərəfindən vəzifəsindən azad edilib.

BBC xəbər verir ki, Netanyahu Qallantı görüşə çağırıb və ona müdafiə naziri olaraq artıq inanmadığını deyib.

Qallant İsrail ordusunda baş verən iğtişaşlardan narahatlığını ifadə edib və bunun ölkənin təhlükəsizliyinə təhdid yaratdığını bildirib. Müxalifətlə dialoqa ehtiyac olduğunu əsas gətirən Qallant Netanyahunun koalisiyasından Ali Məhkəməni zəiflətmək istiqamətindəki planını gələn ay tətildən sonra parlamentin toplantısına qədər gözləməyi xahiş edib.

"İsrailin təhlükəsizliyi naminə, oğul və qızlarımızın xatirinə qanunvericilik prosesi hələlik dayandırılmalıdır", - Qallant deyib.

Hökumətin məhkəmə sistemi üzərində nəzarətini artırmaq planı İsrail tarixində ən böyük etiraz hərəkatına və hətta prezidentin vətəndaş müharibəsi xəbərdarlığı da daxil olmaqla böyük milli böhrana səbəb olub.