“Əsir düşmək yoxdur, özünüzü partladın”

Şimali Koreya rəhbərliyi Ukraynaya döyüşməyə göndərdiyi hərbçilərdən əsir düşməkdənsə, özlərini partlatmalarını tələb edir.

Bu barədə məlumatı Cənubi Koreyanın "Daily NK" qəzeti yayıb. Qəzet yazır ki, Şimali Koreya diktatoru Kim Çen In əsgərlərini Ukraynadakı cəbhəyə göndərərkən onlara ukraynalılara təslim olmaq əvəzinə, özlərini qumbara ilə partlatmağı əmr edir. Döyüşdə özlərini partlatmaq qorxusuna qalib gəlmək üçün Şimali Koreya əsgərlərinə həftədə iki dəfə siyasi dərslər keçirməyə başlayıblar. Bu dərslər zamanı döyüş meydanında özlərini partlatmağı seçən Şimali Koreya əsgərlərinin "qəhrəmanlıq nailiyyətləri" qeyd olunur. Şimali Koreya əsgərlərinin cəsarətinin, hətta ümumiyyətlə düşmənə təslim olmaq əvəzinə, canlarını qurban verməyə qadir olmayan rus əsgərləri ilə müqayisədə fərqli olduğu qeyd olunur.

Qeyd olunur ki, dərslər Şimali Koreya əsgərləri üçün mesajlarla keçirilir və onlara cəsur bir məqsəd uğrunda ölməklə əbədi yaşayacaqları fikri aşılanır. Hətta yeni bir şüar da ortaya çıxıb: "Gəlin özlərini partladan əsgərlərdən dərs alaq".