İran gizli diplomatiyaya başlayır: Yüksək rütbəli rəsmi Omana yollanır - SENSASİON DETALLAR

Regionda hərbi gərginliyin pik həddə çatdığı bir vaxtda Tehranın eyni anda iki istiqamətdə – həm Oman, həm də Rusiya xəttində gizli və çevik diplomatiya yürütməsi dünya gündəminin mərkəzinə çevrilib.

İran hakimiyyətinə yaxınlığı ilə tanınan “Tabnak” saytı yüksək vəzifəli bir rəsminin yaxın günlərdə Omana səfər edəcəyi barədə xəbər yayıb. Səfərin detalları və həmin şəxsin kimliyi rəsmən gizli saxlanılsa da, bu gəlişin Tehran və Vaşinqton arasında davam edən "pərdəarxası" danışıqlarla bağlı olduğu şübhə doğurmur. Məlumata görə, Oman tərəflər arasında ənənəvi vasitəçi rolunu oynayır və cümə günü başlayan kritik görüşlərə məhz bu ölkə ev sahibliyi edir. Diplomatik qaynaqlar bu səfərin Donald Tramp administrasiyasının Fars körfəzinə donanma göndərməsi ilə müşayiət olunan "maksimum təzyiq" siyasətini yumşaltmaq məqsədi daşıdığını bildirirlər.

Bu diplomatik manevrlər fonunda diqqət çəkən digər sensasion məqam isə İranın Ali Milli Təhlükəsizlik Şurasının katibi Əli Laricaninin əvvəlcədən açıqlanmamış səfərlə Moskvaya getməsidir. Laricaninin səfər çərçivəsində Rusiya prezidenti Vladimir Putinlə təkbətkə görüşdüyü artıq təsdiqlənib.

Ekspertlər hesab edirlər ki, Tehran eyni anda həm Vaşinqtonla "qırmızı xətt"ləri dəqiqləşdirir, həm də Moskva ilə strateji koordinasiyanı gücləndirərək özü üçün "təhlükəsizlik çətiri" formalaşdırmağa çalışır. Laricaninin Moskva görüşündə hərbi-texniki əməkdaşlıq və Rusiyanın regiondakı mümkün rolu barədə mühüm razılaşmaların əldə olunduğu ehtimal edilir. Beləliklə, İran eyni vaxtda həm Qərb, həm də Şərqlə qurduğu bu "təhlükəli oyun"la regional təhlükəsizlik balansını öz xeyrinə dəyişməyə cəhd edir.