"Qarabağ"ın qapısına təyin edilən penalti yanlış qərar imiş

Məlum olduğu kimi, "Qarabağ" Çempionlar Liqasının keçid pley-off mərhələsinin ilk matçında "Nyukasl"a 1:6 hesabı ilə məğlub olub.

Görüşün 32-ci dəqiqəsində Ağdam təmsilçisinin qapısına təyin olunan penalti müzakirələrə səbəb olub. "Azərbaycan Futbol Hakimləri"nin dəyərləndirməsinə görə, hakimin bu epizodda penalti təyin etməsi yanlış qərardır.

Qaydalara görə, bir oyunçu yerə yıxılarkən və ya sürüşmə fəndi edərkən bədən müvazinətini qorumaq üçün əlini təbii şəkildə yerə qoyursa, bu "dayaq əli" hesab olunur.

Beynəlxalq Futbol Assosiasiyaları Şurasının (IFAB) təlimatlarında açıq şəkildə qeyd olunur ki, əgər top məhz bu vəziyyətdə olan ələ dəyirsə, bu, bədənin süni şəkildə böyüdülməsi sayılmır və qayda pozuntusu hesab edilmir. Yəni futbolçu yıxılarkən əlini başqa yerə qoya bilməyəcəyi üçün bu hərəkət tamamilə təbii fizioloji prosesdir.