Bakı 2019-cu ilin may ayında (16-19) ilk dəfə olaraq, gimnastikanın 2 növü üzrə birgə Avropa Çempionatına ev sahibliyi edəcək. Belə ki, bu il bədii və aerobika gimnastikası üzrə qitə birinciliklərinin təşkili məhz Azərbaycan Gimnastika Federasiyasına həvalə olunub.
16-19 may tarixlərində Milli Gimnastika Arenasında start götürəcək ilk çempionat, artıq 4-cü dəfədir ki (2007, 2009, 2014, 2019) paytaxtımızda təşkil olunan bədii gimnastika üzrə 35-ci Avropa Çempionatı olacaq.
4 gün davam edəcək bu çempionatda fərdi proqramda böyük gimnastlar, qrup hərəkətləri proqramında isə gənc komandalar çıxış edəcəklər.
Yarışların ilk gününə gənclərdən ibarət qrup hərəkətləri komandalarının çıxışları ilə başlanılacaq. 17 may tarixində isə yalnız böyük gimnastlar xalça üzərində öz güclərini sınayacaqlar. Çempionatın 3-cü günü artıq komanda hesabında (böyük gimnastlar və gənc komandaların ortaq xalları əsasında) və qrup komandalarının çoxnövçülük yarışlarında qaliblərin adları açıqlanacaq. Və turnirin son günü ayrı-ayrı alətlər üzrə Avropanın ən yaxşı gimnastlarının adları məlum olacaq.
Qeyd edək ki, çempionatda 35 ölkədən gimnastların iştirakı gözlənilir.
Ən zərif gimnastika növünün təmsilçilərinin icrasında ovsunlayıcı çıxışları izləmək istəyən tamaşaçılar artıq öz biletlərini Arenanın kassasından, 28 Mall və Gənclik Mall alış-veriş mərkəzlərindən, həmçinin onlayn https://ticketing.mga.az/ əldə edə bilərlər. Təsnifat və final günlərindən asılı olaraq, biletlərin qiyməti 8, 10, 12, 15 və 20 manat təşkil edir.
Xatırladaq ki, Federasiyasının bu il daha sərfəli şərtlərlə təqdim etdiyi Mövsümi Bileti də gimnastika yarışlarının daimi izləyiciləri (ətraflı: http://agf.az/az/news/2151//competitions/information/159) Arenanın kassasında ala biləcəklər.
Yarışlar haqda məlumatlar mütəmadi olaraq saytımızda yenilənəcək.
Yarışların başlama vaxtı:
16 may - 17:00
17 may – 12:00
18 may – 10:00
19 may – 12:00
Məkan: Milli Gimnastika Arenası
.jpeg)
