Rusiya XİN-dən “3+3” bağlı AÇIQLAMA: "Tərəfdaşlarla şərtləşdik ki..."

2021-ci il dekabrın 10-da təşkil olunan “3+3” konsultativ regional platformanın təsis iclasını uğurlu hesab edirəm.

Rusiya xarici işlər nazirinin müavini Andrey Rudenko bu sözləri TASS-a müsahibəsində söyləyib.

Diplomat deyib: “Biz görüşün yekunlarına əsasən tərəfdaşlarla şərtləşdik ki, formatın fəaliyyətini qarşılıqlı maraq doğuran və regionda etimad tədbirlərinin gücləndirilməsinə yönəldilən məsələlər üzərində cəmləşdirək. Ticari-iqtisadi, nəqliyyat və mədəni-humanitar əlaqələrin inkişafı, həmçinin ümumi çağırışlara və təhdidlərə müqavimət həmin məsələlər sırasındadır”.

A.Rudenkonun sözlərinə görə, tərəflər iclasları müntəzəm əsasda ildə azı 2 dəfə keçirməyi qərara alıblar. Növbəti tədbirin keçirilməsi üçün artıq bir neçə ölkədən müraciətlər daxil olub.

“Gürcüstana gəlincə, bütün iştirakçılar onun “3+3” formatına birləşəcəyinə ümidvar olduqlarını ifadə ediblər. Tbilisi üçün qapı açıq qoyulur. Vacibdir ki, regional işlər Cənubi Qafqazın bütün ölkələrinin iştirakı ilə müzakirə olunsun”, - deyə Rusiyanın xarici işlər nazirinin müavini qeyd edib.