Şəhid ailələrindən plakat üçün 150 manat alınıb? - RƏSMİ

Şəki şəhərində yolların kənarında yerləşdirilmiş Vətən müharibəsi şəhidlərinin plakatları haqda irəli sürülən iddia müzakirələrə səbəb olub.

Sosial şəbəkələrdə bu plakatların yerləşdirilməsi üçün şəhid ailələrinin hər birindən 150 manat məbləğində pul alındığı söylənilib.

Şəki Şəhər İcra hakimiyyəti Vətən müharibəsi iştirakçıları və şəhid ailələri ilə işin təşkili şöbəsinin müdiri Tural Məmmədov “Ölkə.Az”a açıqlamasında bildirdi ki, icra hakimiyyəti bu məsələyə qarışmayıb:

“Şəhid ailələri öz təşəbbüsələri ilə razılığa gələrək bu işi həyata keçiriblər. Biz sadəcə olaraq onlara yer təyin olunmasında və icazə alınmasında köməklik etmişik”.

Qurum nümayəndəsi qeyd edib ki, şəhid ailələri belə bir təşəbbüslə müraciət edərək yer təyin olunmasını istəyiblər: “Biz isə həmin ərazidə kommunikasiya xətlərinin olub-olmamasını yoxlayaraq buraya plakatların qoyula biləcəyini demişik. Qalan məsələləri hər şəhid ailəsi öz təşəbbüsü ilə edib”.