Respublika Neyrocərrahiyyə Xəstəxanasının direktoru,
Fərhad Həsənov 15 İyun – Milli Qurtuluş Günü müasir Azərbaycan dövlətçilik tarixinin ən mühüm hadisələrindən biridir. Bu əlamətdar gün xalqımızın yaddaşında yalnız siyasi hakimiyyət dəyişikliyi kimi deyil, həm də dövlətçiliyin məhv olmaq təhlükəsindən xilas edilməsi, ictimai-siyasi sabitliyin bərpası və gələcək inkişaf strategiyasının müəyyənləşdirilməsi baxımından tarixi əhəmiyyət kəsb edir. Milli Qurtuluş Günü müstəqilliyimizin qorunmasının, dövlətçilik ənənələrinin möhkəmləndirilməsinin və milli birliyin təmin olunmasının təcəssümünə çevrilmişdir.
XX əsrin sonlarında yenidən dövlət müstəqilliyini bərpa edən Azərbaycan ciddi daxili və xarici təhdidlərlə üzləşmişdi. Nəticədə xalqımız ağır sınaqlarla qarşılaşdı, torpaqlarımızın işğalı prosesi başladı, ölkədə siyasi-iqtisadi və sosial vəziyyət gərginləşdi. Müstəqilliyin ilk illərində hakimiyyətdə olan qüvvələrin səriştəsiz fəaliyyəti vəziyyəti daha da ağırlaşdırdı. Dövlət idarəetmə sistemi iflic vəziyyətinə düşmüş, iqtisadi tənəzzül dərinləşmiş, qanunsuz silahlı dəstələr özbaşınalıq törətmiş, ayrı-ayrı bölgələrdə separatçılıq meylləri güclənmişdi. Dövlət müstəqilliyi və suverenliyi real təhlükə ilə üz-üzə qalmışdı. Ölkədə anarxiya və xaos hökm sürür, vətəndaş qarşıdurması təhlükəsi getdikcə artırdı.
1993-cü ilin iyununda baş verən hadisələr vəziyyətin son dərəcə kritik həddə çatdığını göstərirdi. Məhz belə bir mürəkkəb və taleyüklü məqamda xalqın ümidi Ulu Öndər Heydər Əliyevə yönəldi. Cəmiyyətin bütün təbəqələri yaxşı anlayırdı ki, ölkəni düşdüyü ağır böhrandan yalnız böyük dövlətçilik təcrübəsinə malik lider çıxara bilər.
1993-cü il iyunun 9-da Ulu Öndər Heydər Əliyev xalqın təkidli tələbi ilə Bakıya gəldi. Bu qayıdış xalqın və dövlətin xilası naminə atılmış tarixi addım idi. Məsuliyyəti öz üzərinə götürən Ulu Öndər ilk növbədə ölkədə sabitliyin təmin olunması istiqamətində qətiyyətli tədbirlər həyata keçirdi. 1993-cü il iyunun 15-də Heydər Əliyevin Ali Sovetin sədri seçilməsi xalqımızın tarixində yeni mərhələnin başlanğıcı oldu. Sonradan bu tarix Milli Qurtuluş Günü kimi dövlət bayramı elan edildi. Həmin gün Azərbaycan dövlətçiliyinin xilası, sabitliyin bərpası və gələcək tərəqqinin təməlinin qoyulduğu gün kimi tarixə həkk olundu.
Ulu Öndər hakimiyyətə qayıtdıqdan sonra qısa müddətdə ölkədə ictimai-siyasi sabitlik təmin edildi, qanunsuz silahlı birləşmələrin fəaliyyəti dayandırıldı, dövlət idarəetmə sistemi formalaşdırıldı. İnsanlarda dövlətə və gələcəyə inam yenidən bərpa olundu. Ordu quruculuğu sahəsində mühüm addımlar atıldı, beynəlxalq münasibətlər sistemində milli maraqlara əsaslanan müstəqil xarici siyasət kursu müəyyənləşdirildi.
1994-cü il mayın 12-də Azərbaycan və Ermənistan arasında atəşkəs sazişi imzalandı. Həmin ilin sentyabrında imzalanmış “Əsrin müqaviləsi” adlanan neft sazişi iqtisadi yüksəlişin əsasını qoydu. Bununla da ölkəyə milyardlarla dollar həcmində xarici investisiyalar cəlb edildi, enerji strategiyasının uğurlu icrası təmin olundu və beynəlxalq iqtisadi əməkdaşlıq üçün geniş imkanlar açıldı.
Ulu Öndər Heydər Əliyevin rəhbərliyi ilə həyata keçirilən islahatlar nəticəsində hüquqi dövlət quruculuğu prosesi sürətləndi. İlk parlament seçkiləri keçirildi, eferendum (ümumxalq səsverməsi) yolu ilə Konstitusiya qəbul olundu, demokratik təsisatların formalaşdırılması istiqamətində mühüm addımlar atıldı. Azərbaycanın beynəlxalq nüfuzu yüksəldi, dünya birliyində mövqeləri möhkəmləndi.
Ulu Öndərin xalqımız qarşısındakı ən böyük xidmətlərindən biri dövlət müstəqilliyini qoruması və dönməz xarakterə çevirməsi olub. O, yalnız mövcud böhranın qarşısını almaqla kifayətlənmədi, həm də gələcək inkişafın strateji istiqamətlərini müəyyənləşdirib. Məhz buna görə də Ümummilli Lider Heydər Əliyevin adı müstəqilliyimizin memarı və müasir dövlətimizin banisi kimi tariximizə əbədi həkk olunub.
Bu gün Ulu Öndərin müəyyən etdiyi siyasi kurs Prezident İlham Əliyev tərəfindən uğurla davam etdirilir. Son illərdə əldə olunan möhtəşəm nailiyyətlər, iqtisadi və siyasi sahələrdə qazanılan uğurlar, beynəlxalq nüfuzun yüksəlməsi həmin siyasətin uğurlu nəticələridir.
Xüsusilə 2020-ci ilin 44 günlük Vətən müharibəsində qazanılmış tarixi Qələbə və 2023-cü ildə Azərbaycan Ordusu tərəfindən həyata keçirilən bir günlük lokal xarakterli antiterror tədbirləri nəticəsində dövlət suverenliyinin tam təmin olunması milli dövlətçilik tariximizin ən parlaq hadisələrindəndir. Bu möhtəşəm nailiyyətlər Ulu Öndərin müəyyən etdiyi strateji xəttin təntənəsi olmaqla yanaşı, Onun ən böyük arzusunun gerçəkləşməsi deməkdir.
Bu gün Qarabağ və Şərqi Zəngəzurda həyata keçirilən genişmiqyaslı bərpa-quruculuq işləri, Böyük Qayıdış Proqramının uğurla icrası, azad edilmiş torpaqlarda müasir şəhər və kəndlərin salınması dövlətimizin gücünü və qüdrətini nümayiş etdirir. Ölkəmizin bütün ərazilərində üçrəngli bayrağımızın qürurla dalğalanması Ulu Öndərin siyasi irsinin zəfər salnaməsidir.
Milli Qurtuluş Günü xalqımızın birlik, həmrəylik və dövlətçilik iradəsinin təcəssümüdür. 15 İyun tarixinin əhəmiyyəti yalnız keçmişin deyil, həm də bugünkü uğurlarımızın və gələcək hədəflərimizin əsasını təşkil etməsindədir. Ulu Öndər Heydər Əliyevin xilaskarlıq missiyası nəticəsində qorunub saxlanılan dövlət müstəqilliyi bu gün daha da möhkəmlənir, yeni uğurlara yol açır və xalqımızı daha parlaq gələcəyə doğru aparır. Milli Qurtuluş Günü dövlətçilik tariximizin ən şərəfli səhifələrindən biri kimi daim böyük ehtiramla qeyd olunur.
.jpeg)
