12:28 – İlham Əliyev İsrailin nəqliyyat və yol təhlükəsizliyi nazirini qəbul edib
12:46 – Prezident Millətlər Birliyi təşkilatının Baş katibi ilə görüşüb
11:04 – İlham Əliyev Leonid Slutski ilə görüşüb
14:08 – Prezident SABAH proqramı ilə bağlı sərəncam imzaladı

Müzəffər Ali Baş Komandan İlham Əliyevin azad olunmuş Laçına səfərləri

27.11.2021, 12:03,
Cəmiyyət

Hərbi əməliyyatların bitməsindən sonra Prezident İlham Əliyevin mütəmadi olaraq işğaldan azad edilmiş rayonlara səfər etməsi dövlət başçısının bu məsələlərə nə dərəcədə həssas yanaşdığının sübutudur. Ərazilərin bərpasına verilən önəmin göstəricisidir ki, Prezident İlham Əliyev böyük qələbədən ötən bir ildə azad edilmiş rayonlarımıza 10-dan çox səfər edib. Özü də heç biri adi bir səfər olmayıb, iri yenidənqurma layihələrinin reallaşması ilə yadda qalıb.

Dövlət başçısının işğaldan azad edilmiş ərazilərin yenidən qurulması və inkişafına nə dərəcə mühüm əhəmiyyət verdiyinə 30 il ərzində ermənilər tərəfindən darmadağın və viran edilən torpaqlarda artıq abadlıq və quruculuq işlərinə başlanılmasını göstərmək olar. İşğaldan azad olunmuş digər rayonlar kimi Laçın da Prezident İlham Əliyevin göstərişi ilə bərpa olunur, cənnətə çevrilir. Cari ilin 14 fevral və 16 avqust tarixlərində cənab Prezidentin Laçın rayonuna səfərləri də ölkəmizin öz gücünə inamdan doğan ali siyasi iradəsinin daha bir nümayişi idi.

Fevralın 14-də səfər zamanı dövlət başçısı rayonun Güləbird kəndində Azərbaycan bayrağını qaldırmış, Laçın rayonunda generasiya gücü 8 meqavat olan Güləbird Su Elektrik Stansiyasının işə salınmasında iştirak etmişdir. Dövlət başçısı qeyd etdi ki, “Bu, azad edilmiş torpaqlarda istismara verilən birinci elektrik stansiyasıdır və bunun çox böyük əhəmiyyəti, böyük rəmzi mənası var. Biz qayıdırıq bu torpaqlara. Biz Kəlbəcər və Laçın rayonlarında ermənilər tərəfindən uzun illər ərzində qanunsuz istismar edilmiş, onlar tərəfindən dağıdılmış bütün su elektrik stansiyalarını bərpa edəcəyik. Düşmən təkcə Laçın rayonu ərazisində 5 su elektrik stansiyasını dağıdıb. Onların hamısı bərpa ediləcək.”

Dövlətimizin başçısı cənab İlham Əliyevin 16 avqust tarixində Laçın rayonuna növbəti səfəri çərçivəsində uzunluğu 72,8 kilometr olan Kəlbəcər-Laçın avtomobil yolunun üzərində tikiləcək 3,4 kilometr uzunluğundakı tunelin, Laçın Beynəlxalq Hava Limanının təməlini qoyması bir daha Qarabağ və Şərqi Zəngəzurun cənnətə çevrilməsi prosesinin sürətlə reallaşdırıldığını isbat edir və Azərbaycan hakimiyyətinin iradəsini nümayiş etdirir. Rayonun Qorçu kəndində təməli qoyulan Laçın Beynəlxalq Hava Limanı Azərbaycanın dəniz səviyyəsindən ən hündürdə yerləşən aeroportu olacaq. Bu, ermənilərə dağlarda çəkilən göz dağıdır. Aeroportda 3 kilometrlik uçuş-enmə zolağının, 6 təyyarə dayanacağının inşası nəzərdə tutulur. Bu hava limanı ətraf ərazilərə hava nəqliyyatı ilə gediş-gəlişi asanlaşdıracaq.

Azərbaycan Ordusu və Müzəffər Ali Baş Komandan Laçın və digər rayonları da işğaldan azad etməklə zəfər, qələbə tarixi yazdılar. Azərbaycan rəhbərinin siyasi iradəsi, verdiyi vədlərlə əməllərinin vəhdəti belə deməyə əsas verir ki, çox keçməyəcək, işğaldan azad edilmiş torpaqlara həyat qayıdacaq, bu ərazilər yenidən çiçəklənəcək, bura təkcə ölkənin deyil, regionun ən inkişaf etmiş məskənlərindən birinə çevriləcək.

Fərqanə Əsgərova,

Salyan şəhər 4 saylı tam orta məktəbin müəllimi