Almaniyada Putinə qarşı istintaqa başlanılır

Almaniyanın iki keçmiş naziri Ukraynaya genişmiqyaslı müdaxilə zamanı rus qoşunlarının hərbi cinayətləri, habelə Rusiya prezidenti Vladimir Putin də daxil olmaqla Rusiya rəsmiləri ilə bağlı təhqiqata başlamaq üçün federal prokurorluğa sənədlər göndərib.

“Xarici media xəbər verir ki, Almaniyanın keçmiş ədliyyə naziri Zabine Leytqoyser-Şnarrenberqer və keçmiş daxili işlər naziri Gerhart Baum aprelin 7-də bildiriblər ki, onlar Ukraynadakı vəhşiliklərə görə məsuliyyət daşıyanları məsuliyyətə cəlb etmək üçün xaricdə törədilən ağır cinayətlərə görə mühakimələrə imkan verən Almaniya qanunlarından istifadə etmək istəyirlər.

Keçmiş məmurlar adından 140 səhifəlik cinayət şikayətini hazırlayan vəkil Nikolaos Qazeas bildirib ki, bu, təkcə Putin və onun Təhlükəsizlik Şurasının 32 üzvü də daxil olmaqla Rusiya rəhbərliyinə deyil, həm də Rusiya ordusunun bir sıra kadrlarına qarşı yönəlib.

Onun sözlərinə görə, şikayətdə Çernobıl AES-ə hücumdan tutmuş Mariupoldakı doğum evinin atəşə tutulmasına qədər olan cinayətlərdən bəhs edilir.

Qazeas əlavə edib ki, federal prokurorlar cinayət işinin açılıb-açılmaması barədə qərar verərkən kəşfiyyat orqanlarının əldə etdiyi məlumatlardan da istifadə edə bilərlər.