Müharibənin həlledici fazası o zaman başlayacaq ki... NATO ölkələri ilə Rusiya arasında Ukraynada davam edən müharibə qlobal miqyas almaqda davam edir. Amerika prezidenti daha 33 milyard dollarlıq yardım üçün Konqresə müraciət edib. Bu vəsaitin yalnız 3 milyardı humanitar yardım üçün nəzərdə tutulur. Qalan vəsaitə yenidən Ukraynaya silah-sursat veriləcək. Söhbət artilleriya, zirehli texnika, tank və zenit silahlarından, kiberhücumlardan müdafiə vasitələrinin gücləndirilməsindən gedir...
"Musavat.com məlumatına görə, “Yanğına benzinlə” gedənlərin arqumentləri hələ ki, dünya üçün keçərlidir. “Hərbi yardım Ukraynada demokratiyaya(?) dəstək və ölkənin Rusiya üzərində qələbəsi üçündür” deyirlər. Ukraynada dünən bir amerikalı, bir ingilis muzdlu öldürülüb, Qərb mətbuatı yazır ki, qəhrəmandırlar. Bu yaramazlar bizi müharibə zamanı Qarabağa muzdlu döyüşçü gətirməkdə ittiham edirdilər, amma indi öz paralı muzdlularına qəhrəman deyirlər...
Silah düccarları isə əllərini ovuşdururlar, müharibə başlayandan ABŞ-ın silah tədarük edən şirkətlərinin səhmlərinin dəyəri ən azı iki dəfə artıb. İndi daha ağır və uzaqvuran silahlar Ukraynaya doğru hərəkət etdikcə, müharibə sponsorlarının iştahaları da artır. Onlar Ukraynanı nəinki qələbə qazanmağa, Krımı da geri almağa səsləyir, Rusiya ərazilərini isə raketlə vurmağa təhrik edirlər. Sənin ərazinə silahlı hücum varsa, sən də hücum etməkdə haqlısan, burası elədir. Ukrayna Rusiya ərazilərini uzaqvuran raketlə vurarsa, Qərb buna ancaq çəpik çalacaq. Ancaq bunun cavabı olacağını da unutmayaq. Rusiya BMT baş katibinin Kİyevdə olmasını heç vecinə də almadı, paytaxtı Qara dənizdən, həm də sualtı qayıqdan “Kalibir”lə vurdu. Müharibənin həlledici fazası bax, o zaman başlayacaq ki, dövlətlərarası açıq hərbi münaqişəyə keçəcək. O zaman Rusiya nə qədər dağılacaq, nə qədər itki verəcək, onu Putin düşünsün. Amma Ukraynadan necə, o zaman ələ gələn nəsə qalacaqmı? Məncə, bunu da arzulayanlar çoxdur. Ukrayna olmasın, ya da elə zəlil günə qalsın ki, daha nə silah, nə pul istəməyə gücləri qalsın.
Rusiyanın silahının tükənəcəyi haqda nağıllara Bayden çətin ki, inana. Rusiyanın bir arağı, bir silahı qurtatmaz. Qərb Rusiyanın bu müharibədə əslində sifətini xilas etməklə məşğuldur. Əgər məğlub olub qoşunlarını müharibədən əvvəlki mövqelərinə qaytarmağa razı olarlarsa, xalqına “bütün dünya ilə vuruşurduq, nə edək...” deyə bilər. Udarsa, “Ukraynanın yox, dünyanın kürəyini yerə vurdum” deyib xoruzlanar..
Hansısa tərəfin bu cür eskalasiya şəraitində həlledici hərbi məğlubiyyətə uğraması və ya həlledici qələbə qazanması indilikdə mümkün kimi görünmür. İkinci variant hər iki tərəfin bu “sürünən” və nəticəsiz müharibədən yorulub, diplomatik həll variantlarına üstünlük verə biləcəyi ilə bağlı idi. İstanbulda bu variantın gerçəkləşməsinə yaxın mövqeyə gəlmişdilər. Amma nə oldusa, Kiyev media ilə də paylaşılan razılaşmadan geri çəkildi, yəni diplomatik həll variantı gündəmdən çıxdı, danışıqlar isə faktiki dayandı. Üçüncü variant Kiyevə yeni silahların gəlməsi ilə münaqişənin xarakterini kəskin şəkildə dəyişməsidir. Ola bilsin, daha müasir texnikalar Rusiya işğalını irəliləməyə və ya durdurmağa kömək etsin. Amma həlledici qələbə üçün bu silahlar yetərli deyil. Ukraynaya atom bombası, ya da nüvə başlığı lazımdır! Zatən müharibə buna görə başlamışdı, bu da bitirsin. İndi adama fantastik, bəlkə də gülməli gələr, prosedur, filan boş şeydir. İndi dünyada elə dönüşlər baş verir ki, hər şey mümkündür. Məsələn, Britaniyanın baş naziri bu təklifi gündəmə gətirə bilər, onda bu zəka var. Amerikanın nüvə başlıqları zatən Ukraynaya yaxındadır, Avropadadır...
Zelenski BMT baş katibini soyuq qarşıladı, bilirsizmi, niyə? Təkcə ona görə yox ki, əvvəl Moskvaya gedib, Putinlə görüşmüşdü. Həm də ona görə ki, yazıq Quttereşin Kiyevə verəcəyi heç nəyi yoxdur- nə pulu, nə silahı... Zelenski isə nəyə görəsə, qonaq gələnlərdən silahla bərabər, həm də çoxlu pul istəyir.
Quttereşin Ukraynaya verə biləcəyi sülhə töhfə ola bilərdi. Məsələn, Mariupoldakı “Azovstal” zavodunda mühasirədə qalan mülkü əhalini xilas etmək… Zelenskiyə və onun arxasında dayanan dövlətlərə isə sülh lazım deyil. Putinin də tavrı müharibədən yanadır. Ona görə o da heç geri çəkilmək haqda düşünmür. Sülhə indilikdə Ukraynada yer yoxdur.
Deyim ki, müharibə başlayanda, həmin yerləri birinci sərçələr və göyərçinlər tərk edir…
.jpeg)
