“Trampın Ukrayna ilə bağlı bu bəyanatını alqışlayırıq”

Avropa İttifaqının (Aİ) Xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallas ABŞ Prezidenti Donald Trampın Ukrayna ilə bağlı qərarını alqışlayır.

Bu barədə “Politico” nəşri məlumat yayıb.

Bildirilib ki, Kallas Trampın Ukraynaya daha çox silah göndərilməsi ilə bağlı bəyanatını alqışlayır, lakin Vaşinqtonun Kiyevə yardımın maliyyələşdirilməsinə də töhfə verməsini istəyir: “Amma biz ABŞ-nin bu yükü paylaşmasını istərdik”.

Kallas amerikalıları Ukraynaya dəstəyi davam etdirməyə çağırıb. O qeyd edib ki, Aİ Ukraynaya silah üçün pul ödəyirsə, bu, həmrəyliyin göstəricisidir və ABŞ də eyni addımı atmalıdır.

Qeyd edək ki, daha əvvəl ABŞ lideri bəyan etmişdi ki, Ukraynaya NATO ilə silah sazişi çərçivəsində ilk “Patriot” zenit-raket komplekslərinin tədarükü artıq başlayıb. Həmçinin bildirib ki, “Patriot” sistemləri Ukraynaya Almaniyadan göndərilir və ABŞ bu tədarüklərə görə tam həcmdə ödənişlər alır.