Prezident Donald Tramp ABŞ-İsrail-İran müharibəsi dövründə Rusiya neftinə aradan qaldırdığı sanksiyanı yenidən bərpa edib.
“Bloomberg” xəbər verir ki, Tramp administrasiyası gəmilərə yüklənmiş Rusiya nefti və neft məhsullarının qanuni satışına icazə verən müvəqqəti sanksiya güzəşt müddətini uzatmayıb. Bu tədbirin müddəti 11 aprel şənbə günü başa çatıb. Güzəştlər Yaxın Şərqdə müharibənin başlamasından sonra enerji bazarlarında kəskin pisləşmə fonunda tətbiq edilib. İranın Hörmüz boğazını bağlaması qlobal neft ixracının gündə təxminən 13 milyon barel azalmasına və qiymətlərin barel üçün 100 dollardan yuxarı qalxmasına səbəb olub.
Bu şəraitdə Ağ Ev qlobal xam neft tədarükünü artırmağa çalışaraq, Rusiya və İrana qarşı sanksiyaları müvəqqəti olaraq yumşaltdı.
“The New York Times”in yazdığına görə, İran neftinin satışına qısamüddətli icazə aprelin 19-da başa çatır, lakin ABŞ Maliyyə Nazirliyi artıq onu uzatmaq niyyətində olmadığını bildirib.
Bu arada, Beynəlxalq Enerji Agentliyinin (IEA) aylıq hesabatına görə, Rusiyanın 2026-cı ilin mart ayında neft və neft məhsulları ixracından əldə etdiyi gəlir 19 milyard dollara yüksəlib ki, bu da fevral ayı ilə müqayisədə 9,3 milyard dollar və ötən ilin mart ayı ilə müqayisədə 4,8 milyard dollar çoxdur.
Rusiyanın neft ixracı gündə 0,27 milyon barel artaraq 4,6 milyon barelə, neft məhsulları ixracı isə 0,05 milyon barel artaraq 2,5 milyon barelə çatıb. Ümumi neft və neft məhsulları ixracı isə gündə 0,32 milyon barel artaraq 7,1 milyon barelə çatıb.
Rusiyanın neft hasilatı mart ayında gündəlik 0,29 milyon barel artaraq 8,96 milyon barelə çatıb.
Lakin bu, OPEC+ sazişi çərçivəsində Rusiyanın kvotasından 0,61 milyon barel azdır. Nəticədə neft hasiləti gündə 10,32 milyon barelə yüksəlib.
.jpeg)
