"Şuşada özəl bir mərkəzimiz olacaq" - Nazir

“2025-ci ilə qədər Dayanıqlı və Operativ Sosial Təminat Agentliyi (DOST) xidmətlərinin bütün ölkə üzrə əhatəsi planlaşdırılır.

“Bunu Əmək və Əhalinin Sosial Müdafiəsi naziri Sahil Babayev deyib. O bildirib ki, növbəti mərhələdə çox geniş spektrda DOST mərkəzləri şəbəkəsi yaradılacaq:

“Ümumilikdə ölkə üzrə 17 regional mərkəzimiz olacaq. Bir regional mərkəz Naxçıvanda, biri işğaldan azad olunmuş ərazilərimizdə, 5 mərkəzimiz Bakı şəhərində, digərləri isə respublikanın digər regional mərkəzlərində olacaq. 47 DOST filialı yaradılacaq. İşğaldan azad edilmiş bütün rayonlarda filiallar olacaq. Eyni zamanda Şuşada sosial xidmətlərin göstərilməsi üçün çox özəl bir mərkəzimiz olacaq. Ölkə başçımız bu istiqamətdə tapşırıqlar verib.

Hazırda Gəncə, Sumqayıt, Bərdə, Quba, Masallı, Şəki, Sabirabad rayonlarda DOST mərkəzləri şəbəkəsinin yaradılması üçün layihələndirmə, tikinti-quraşdırma işlərinə başlanılıb. Düşünürük ki, 2023-cü ilin sonuna qədər 8 regional mərkəz yekunlaşdırılacaq, bununla 13 regional mərkəzimiz olacaq. 2025-ci ilə qədər isə 17 regional mərkəzin hər biri fəaliyyət göstərəcək”.